[Braunschweig-Wolfenbüttel, Herzog Julius von]: Corpus Doctrinae, Das ist/ Die Summa/ Form und Fürbilde der reinen Christlichen Lehre/ aus der heiligen Göttlichen Schrifft der Propheten und Aposteln zusammen gezogen. Helmstedt, 1603.

daß beyde der Papisten vnd der Sacramentierer Irrthumb durch Gottes Gnade verhütet / vnd von diesen Kirchen abgehtlten möchte werden.

Belangend aber die Einredung vnd Gegenworff der Sacramentierer aus den Artickeln / von den zweyen Naturen in Christo / von der Himmelfahrt Christi vnd seinem sitzen zur Rechten Gottes / dauon haben wir oben meldung gethan / vnd Erklerung gesetzt.

ALso haben wir einfeltig vnd deutlich / vermittelst Göttlicher Verleihung (aus der alten bewehrten Grundfest des vnfchlbaren / vnbetrieglichen Worts / die Gott selbst mit mancherley vbernatürlichen Mirakeln vnd Wunderwercken confirmirt vnd bestetigt) die einfeltigen Pastores vnd Kirchendiener dieses löblichen Fürstenthumbs / vnd wer sich sonst dieser vnser Arbeit gebrauchẽ wil / gelehret vnd vnterrichtet / wie sie die streitigen Religions Artickel einfeltig vnd richtig verstehen / mit Gottes Wort bescheinen vnd bewehren / auch ohne Ergerniß / mit grosser bescheidenheit dauon reden / vnd sich aller Fürwitzigen vnd zur Erbawung vndienlichen Disputation vnd mutwilligen Gezencks enthalten vnd entschlagen / vnd doch allen Obiectionibus, die sie von der Warheit abwenden wollen füglich aus Gottes Wort begegnen / vnd dieselbige ableinen können.

Vermahnen hierauff ernstlich alle Pastores vnd Seelsorger / bitten sie auch durch die Lindigkeit vnd Barmhertzigkeit Gottes / sie wollen diese Schrifft in der Furcht des HErrn fleissig lesen / vnd jnen dieselbige neben dem gar nützen notwendigen Büchlein D. Vrbani Rhegij seligen fein gemein vnd bekant machen / vnd wollen ja bey jhrem lieben Catechismo, bey der lieben Einfalt bleiben / sich aller hoher / subtiler / in heiliger Schrifft vngegründter / vnd in der heiligen Christlichen Kirchen vngewöhnlicher vnd vngebreuchlicher Reden / Deßgleichen aller vnnothwendigen / vnfruchtbaren / hochschedlichen Disputation vnd Gezencks enthaltẽ / vnd dieselbige nicht für den armen gemeinẽ Man auff die Cantzel bringen / vnd jhn damit verirren vnd verwirren / sondern bey der liebẽ Einfalt bleiben / Vnd da etwas frembdes vnd newes von andern auff die Bahn gebracht würde / daß sie solchs ja nicht auff die Cantzel tragen / sondern sich zuuor vnterrichts vnd bescheids bey dem Consistorio darauff erholen / vnd nichts lehren / das Gottes Wort nicht ehnlich vnd gemeß sey / damit die Ehre vnsers lieben gantz getrewen frommen Gottes befürdert vnd außgebreitet werde / sein Gnadenreich zu vns komme / vnd wir der mal eins aus dem Gnadenreich Christi in sein großmechtiges Ehrenreich transferirt vnd versetze